” كونى برد يا نار ” / “هربانة م الدنيا”
شعر : عبد المجيد راشد / د. حنان فاروق
كونى برد يا نار
و كونى
صرخة فى عتمة سكونى
شمعة فى ليلة سجونى
همسة فى قلبى و عيونى
نغمة
فى لحنى و شجونى
كونى بركان للغضب
هزى ايام التعب
اولدى منها نهار
حركى فيها انتظار
انفخى فى ترابها روح
طببى كل الجروح
رممى كل الشروخ
أولدى فى روحنا الشموخ
علّى صوتنا من لهيبك
حـّّرضي و احنا نجيبك
اكتبى و احنا نغنى
اطلبى و احنا نمنى
دوبى فينا السنين
حركى فينا الحنين
حفزى و احنا نلين
دوبى فينا إستكانة
فجّرى فى نفوسنا دانة
فوقينا من استهانة
بالمقاومة و العناد
بالإرادة و الانتفاضة
بيها نتغير و نخرج
من ظلام كاتم بيخنق
من عصابة دورها تشنق
كل حلم بأمة أجمل
كل رؤية لعيشة أنبل
كونى سكة يا نار تزلزل
كل سلطة خاينة لينا
خاينة أحلامنا السفينه
اللى بيها نعدى بكره
يا نسيم الصبح ميل
عندنا و إرمى السلام
شوقنا للحرية طوّل
يا نسيم شق الغمام
عدى يا أحلامنا عدى
بكره فجره جاى مندّى
هدى يا أوجاعنا هدّى
كل فجر و خده وردى
بكره جاية الثورة طارحة
شوق جراح العمر فرحة
