———————————————
العيــــد ما كانـــــش سعيــــد

                     العيد ما كانش سعيد

                                شعر : عبد المجيد راشد

 

العيد ما كانش سعيد

حزنه كان

أكبر من الفرحة

لما يحاول يبتسم

يفتكر شهداء و جرحى

و أمة مكلومة

و مهمومة

أمة مش منتصرة

و لا مهزومة

بين البنين و الوقت بيعدى

الدمعة سيل على خدها الوردى

و الحزن أتقل م الجبال

أحمالها أكبر من الإحتمال

و قلبها موجوع

نظرتها سارحة ليوم رجوع

تدوق فى صبحه طعم انتصار

من غير دموع

أو خيانة

أو ذل و ركوع

أو كلاب تطفى

نور و نار الشموع

عملاء

و متسلسلين

تلاقيهم فى كل مكان

فى فلسطين

أو فى العراق

أو لبنان

أو فى الصومال

و السودان

و أفغانستان

كلهم من عينة عباس

أو كرازاى

أو جنبلاط

أو أى محتاس

وسواس

خناس

و فى كراستهم

حاصلين

بتوقيع  صهاينة و أمريكان

على درجة زمالة الشيطان

عملاء

أذلاء

جبناء

و لا حد فيهم

يعرف أصول

أو فرض

وكلهم فى نفس

 خط  الطول

وخط العرض

مع أنظمة تحكم

بدستور العصابة

و بقوانين الغابة

و بأخلاق الديابة

و شعوبنا أغلب م الغلابة

تحلم ببكرة

و لا إجابة

و تقولى عيد

يارب قرب لنا المواعيد

و ساعدنا عيدنا يبقى عيد

نشوف شعوبنا بحال جديد

متوحدة و عزمها أشد

تحد الحد

و ترفع راية العصيان

تخرج جموعها فى الميدان

و نطهر الأمة

من كل جيفة

و رمة

و نبنى بكرة بهمة

لكل واحد مهمة

و الكل متوحد فى حلم

و بجهدنا نجسده

ننهض نعلّى

نبدأ نحلّى

و ندوق طعم غير المر

و قلوبنا تعرف يعنى ايه النور

و روحنا تطير من براح لبراح

و تقول لكل اللى تقابله :

يا حر

نعيش أيام تسر

و تعود نفوسنا للصفا

نرجع نلاقى اللى اختفى

بيطل

و روايح المجد و العزة تهل

و نحس ان العيد سعيد

و نحس قرب البعيد

و بداية المواعيد

لفجر أخضر جديد

حضنه فريد

قلبه وليد

نوره يملا البراح

تهلل الأرواح

و تغنى أنبل نشيد

و نحس إن العيد سعيد

 

   

  الأحد 14 أكتوبر 2007

 

      2 شوال 1428

      ثانى أيام عيد الفطر

 

كتبها عبد المجيد راشد، في 16 October 2007 13:16 PM———————————————

ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج  |   دوّن الإدراج