المسحـــــراتى : لكــــل عتمــــــة نهـــــار .. شعر / عبد المجــيد راشـــد
كتبها عبد المجيد راشد ، في 23 أغسطس 2009 الساعة: 19:32 م
المسحــــراتى : لكل عتمة نهـــــار
شعر : عبد المجيد راشــــد
مسحراتى
بصرخ ليلاتى
على طبلة صوتها
آنين ناياتى
أصحوا و فوقوا
لكل آتى
أوجاعنا جارحة
و دموعنا سارحة
أوضاعنا شارحة
من غير ما هاتى
****
يا مر روحى و حلقى
من علقم الأيام
كل الجراح بتطيب
و جرحى ما بينام
سنين تجر سنين
و أنا وحدى
مش لاقى حضنك
و لا صوتك
مش لاقى شكلك
و لا ملامحك
و لا همسك
ولا سكوتك
مش لا قى حنيتك
و لا حقى من قوتك
مش لاقى غير خفافيش
عايشه فى ظلام ليلك
خطفاكى من حضننا
و من سنين عمرنا
و من ربيع حلمنا
و من ضيا فجرنا
حرماكى من قولك
منعاكى من دورك
قاطعة حبال نولك
و معيشانا ف هم
و جرح ما يتلم
صبح و مسا فى الغم
باعوا العرق و الدم
خفافيش و هجموا
فى ضلام الليل
حاصروا الفرات و النيل
و الحلم قلبه عليل
من حمل أتقل م الجبال
أجيال ورا أجيال
و من عرابى لجمال
و من نضال لنضال
لساك يا حلم الرجال
بتحرك الساكن
و بترفع المبتدأ
تجر عشاقك
و تضم أحبابك
على خطى العصيان
و نوبة م الصحيان
تهل و تغطى
كل النجوع و الكفور
و الحوارى و المدن
تعدى و تخطى
و الصوت يهز الميدان
الخطوة مش مستحيل
و لا الطريق مقفول
مسحراتى و بقول
الظلم حتما يحده حد
مهما الجراح تشتد
مهما الصراع يحتد
مهما الطرق تنسد
لكل جزر مد
و لكل ليل فجره
و لكل عتمه نهار
بعزيمة الأحرار
من كل حى ودار
صوت الجموع هدار
يهد أعتى جدار
و يهزم الأشرار
و مهما زاد البعاد
صوت الجموع
له آوان ومعاد
مسحراتى بطول البلاد
اصرخ ليلاتى
اصحوا و فوقوا
لكل آتى
رمضان كريم
شهروعظيم
فيه العظات
و المعجزات
و الانتصار
الفجر لازم يولد نهار
و الصبح مولود من نور و نار
مسحراتى
و فى انتظار
الأمة ترفع
راية انتصار
رمضان كريم
يا نايم اصحى
وحد الرزاق
……………….. عبد المجيد راشد
أولى ساعات السبت : 15 أغسطس 2009
ـــــــــــــــــــــــــــــــــــــــــــــــــــــــــ
التصنيفات : المسحراتى | أرسل الإدراج | دوّن الإدراج
أغسطس 26th, 2009 at 26 أغسطس 2009 4:11 م
مسحراتي ومنقراتي بأنقر على الطبلة همي وآهاتي
أصرخ بعلو صوتي يادنيا قومي واسمعي صوتي
حضنك يابلدي وحشني ولسعة الغربة على الجسم سوط ولطمة
مش عارفة انعي حضن هجرني ولاأبكي موت جوى قلبي ولاأقول يا مسحراتي تعالى ونوح على دموعي ودمي
أيها المصري اثائر لك تحية وسلام