فى ذكرى النصر الإلهى … رسائـل الزمــــن المـــــر (9)
كتبها عبد المجيد راشد ، في 25 مايو 2009 الساعة: 18:14 م
فى ذكرى النصر الإلهى
رسائـل الزمــــن المـــــر (9)
وصلتنى الرسالة التاسعة من أخى و صديقى الشاعر الرائع المبدع أحمد شلبى فى الأحد الثامن من إبريل 2007 و رددت عليها فى السبت الرابع عشر منه .
و اليكم الرسالة و الرد .
أولا : الرسالــة
……………….
العباية ..
حكايه
خيمه وسيعه
بعمق أوجاعنا
تئوينا وتساعنا
متبطنه بالمسك
مفروشه بالحنه
تضمنا وتحضنا
اقباط وسنه
هوتو وتوتسى
شيعه وموارنه
والعمامة …
رايه ..
وعلامه
متخضبه بالشرف
متلونه بالخطر
مشدوده على هامه
شامخه على قامه
فردت علينا ضلها النادى
مجاريح هوى …ويتامى
وهانونا ناس ياما
حكام على أعادى
جرحو فؤادى وبلادى
قالو الهزيمه قدرمكتوب
على جبينا
والذله بين البشر
من صحيح دينا
وأطلقتها .. هيهات
يا عمنا السيد
نفسى أزور وأبات
أهنى وأعيد
آخدلى لقمه وفرشه
أفردها وأجاور
أزاحم كتوف الخلق
أشب وأشاور
تلقطنى بسمة عيونك
تعرفنى .. تندهلى
أطير وأسكن فى حضنك
انت الحميم .. أهلى
باحب فيك الكرامه
والابتسامه الخجوله
ياللى نفضت التراب
من فوق بريق الرجوله
رجعتنى للأغانى
غسلتلى وجدانى
لمعت فيا معانى
غطاها ياما الصدأ
واللى انتهى من زمانى
يادوب لقيته .. بدأ
لما اسمعك ف الصبح
بيبقى أحلى صباح
لما اسمعك بالليل
باعرف أنام بارتاح
ولسه فى نفسى حاجات
ياعمنا السيد
نفسى أزور وأبات
أهنى وأعيد
آخدلى لقمه وفرشه
أفردها وأجاور
أزاحم كتوف الخلق
أشب وأشاور
تلقطنى بسمة عيونك
تعرفنى .. تندهلى
أطير وأسكن فى حضنك
انت الحميم أهلى
ويطيب لحالى المقام
تقوللى استنى
لسه ف قلبى كلام
تقوللى اتمنى
ياسيدى خجلان
تقول ولا يهمك
نفسى .. أنا عشمان
أبوس جبين .. أمك
أحمد شلبى
ثانيا : الــرد
……………
يا روايح النصراللى هلت
من جنوب لبنان
والده من بطن أمتنا
ألوف شبان
قلوبهم الخضرا تهفهف
و الحناجر فى الميدان
شبان و هزموا يأسهم
لما رأوا وجها حسن
صوته رخيم
طالعته خط مستقيم
كلمته شوكة ف حلق
كل شيطان رجيم
من حكام الخيانة
الى عملاء عدو جديد قديم
من أول التاريخ
الى حتفه الأليم
و عبايته حضن لأمته
العدل رايته
و الحق رؤيته
الأمه غايته
و المستضعفين قضيته
العزة علمه
و الكرامة سكته
نفسه عصية أبية
حلمه ما يعرف حدود
و طريقه ما يعرف سدود
و تاريخه ممتد لجدود الجدود
من سيد الشهداء
و لآخر العهود
الله عليك الله
الله عليك يا حسن
الله يا نصر الله
يا صاحى ف عز نومتنا
بتحمى أمتنا
و تصون كرامتنا
و تبدد الأوهام ف عقول أنظمتنا
و تزرع الأمل فى نفوس عروبتنا
و تهزم اليائسين من كل صنف و لون
منهم الرمة
اللى قال مغامر
و منهم الجيفة
اللى قال موالى لإيران
و هما و كلاء الشيطان
عملاء الصهاينة الأمريكان
مسميين نفسهم حكام
و هما أضل سبيل من الأنعام
يا سيد المقاومين العظام
انت المدد
و انت السبيل
و انت الجليل ابن الجليل
و انت صورتك لما تطل
تتهز ليها " اسرائيل "
و تحس بالذل الذليل
انت الجميل
فى وسط اتنين و عشرين عليل
منهم الذليل
و منهم العميل
و منهم العويل
و منهم القليل
و منهم البليل
و منهم اللى عمره ما هيكون دليل
انت الأمل
و المستحيل
انت الطلوع قنديل
لأمتنا ينور الليل
يا عمنا السيد
يا حلمنا العابر حدود الفرات و النيل
الطلة منك دوا
و الكلمة منك شروق
الله عليك الله
الله يا شاطر حسن
الله يا نصر الله
عبد المجيد راشد
الأخوة الأعزاء :
بعد نشر الرسالة على المدونة ، تفاعلت أختنا الأعز الأكرم الأبلغ د. حنان فاروق ، و شاركتنا نصنا بهذا النص ، و اليكم التفاعل :
معرفش ليه..
لما كان بيقول على النصر اللى جى
كنت باشعر أن قلبي لسه حي..
كانوا ساعتها يقولوا بعض ناس..
موش حينفعنا الحماس..
لما تندك القلوع من ده الأساس..
كنت باصرخ جوه روحى..
وانتزع آهة جروحى ..بألف لأ…
مااندفن فى الدنيا حق..
كل كلمة جات بصدق..
لما شفنا دمنا طرح القنابل..
فجرت شوقنا اللى طالل..
وانطمس ضل العدو…
وشه
اتشوه على ملو الفضا …
سقف الكون فى المدى..
للى قال..
مافيش محال..
نصرى طارح مروى بدموع الشهيد
نصرى راجع من جديد
والقلوب اللى فى أمسى كانت بترجف م الهوا
صارت حديد..
فيه أمل…مافيش سقوط
كن مع الله وابتدى
ماتخاف تموت..
د. حنان فاروق
الأخوة الأعزاء : شاركتنا أختنا المبدعة الرائعة هيفاء فويتى بهذه الأبيات و التى أبت كلماتنا إلا أن تتجاور مع كلماتها
اليكم الأبيات
سلامُ للغار أزهر على أقدامه إلى حسن نصر الله
………………………………..
سلامًُ للغار أزهرَ على أقدامــــه
سلامُ للنصر المحقَق بأيامـــــــه
سلامُ للشعب المحبّ أمامــــــــه
سلامُ لفلسطين سرّ غرامــــــــه
سلام لفقير يحقق أحلامــــــــــه
سلام لمظلوم يلقى سلامــــــــه
سلامُ لأحرار رفعت أعلامــــه
سلامُ لمقاوم يحمل وسامــــــــه
سلامُ للحكمة روح كلامـــــــــه
سلام للطلة بدر تمامــــــــــــــه
سلامُ لمن صاغ للحق أحلامــه
سلامُ لمن بالعزّ تكتب أقلامــــه
سلامُ..لمن لقب الشهيد مرامـــه
سلامُ ..لجبل عظيم هي قامــــــه
سلامُ.. أحبه الخلود ولاسمه رامه
سلام لشعب باسمك زاد هيامــه
هيفاء فويتى
ـــــــــــــــــــــــــــــــــــــــــــــــــــــــــ
التصنيفات : وجع الفؤاد | أرسل الإدراج | دوّن الإدراج
