خانّى القلم

مقدرش يكتب حرف

عن دمنا الراوى عطش سينا

عن عضمنا المدفون

تحت جذور النخيل

شامخ فى أراضينا

عن كل قلب اندهس

يصرخ يا أهالينا

مكتوب علينا الجرح

ما يتلم

مكتوب علينا الهم

مكتوب علينا

يا كل خال

و ياعم

ما نرتاح

و لا يهدا لنا بال

أو تندمل لينا جراح

إلا ما ناخد بتارك

يا شهيد الكفاح

يا صوت السما ف البراح

و مجدنا الآتى

ومجدنا اللى راح

يا قهرة قلوب الأمهات

فى النواح

و يا دمعها السيال

فى زغروتة الأفراح

(2)

دم الشهيد

زى السراج المنير

لما ينادى

تسمع فى قلبك نفير

تحس روحه مرفرفة ع الوطن

محفور فى صفحات الزمن

مهما رموز الخيانه

و الذل و الاستكانه

و العار و المهانه

طفوا نيران الدم

فما حد يقدر

على دم الشهيد

(3)

دم الشهيد

طوفان

يهز البليد

و يقرب المواعيد

دم الشهيد

بركان

يوم ورا يوم

غضبه يزيد

ناره تقيد

دم الشهيد

وصيته للكل

ما يفل الحديد

إلا الحديد

(4)

تار الشهيد تارنا

شاهد على أرضنا

شاهد على ديارنا

سارى علم للوطن

و لون الدم فى قماشه

حامى لمن عاشوا

واقف لأحناشه

تار الشهيد جرحنا

ما يلمه غير الدم

الدم عنوان الشهيد

و الدم ما يرتاح

إلا بدم

دم الشهيد دمنا

تار الشهيد حلمنا

تار الشهيد عرضنا

تار الشهيد دينا

(5)

نظامنا معدوم

الاحساس

باع الدم

وباع الناس

باع المصنع

باع الفاس

نظام وسواس خناس

كل قضيته عرشه

و عرشه بإذن الله

و بإرادة شعبنا

نعشه

(6)

دم الشهيد بيعيش

سنين ورا سنين

ليوم الدين

و الدم بالدم

قانون إلهى

ما يغيره حاكم

عميل

ذليل

قليل الحيله

حكمه عويل

دم الشهيد جليل

صبره نبيل

فى الليالى المعتمة

قنديل

و فى النهار

أزميل

يحفر فى روحنا

معانى العزة و الكبرياء

مشتاق يا دم الشهيد

مشتاق

للتار من دما الأعداء

مشتاق

و عضمك يصرخ

تحت الرمال ف سيناء

فليسقط العملاء

فليسقط الجبناء

فليسقط الضعفاء

عبد المجيد راشد